السلفي زوالي بطبعو

السلفي زوالي بطبعو 

على شاب عايق كرز من الدنيا و كره الخلايق تربى في حومة شعبية بين المشاكل و المصايب ، وين الفقر مشعل سيجارو ، شدلو جنبو  وما هوش ناوي يفارق ، بطال مسكين وموش ذنبو لا نجم يقرى ولا نجم يحك جنبو ، أيس من الحياة وما عليه ملام، في بلد الصالح فيها محسوب سارق ، غرت به الدنيا و للكاس عاشق ، نهار يخدم و 10 قاعد ، حتى من الزهر راقد ، قمر ما ربح ، حرق ما وصل، سكر ما فلح، باع ما ربح ، مسكرة في وجهو البيبان، وامشي يا زمان واجا يا زمان وهاو قالو عملنا ثورة ولقينا للكرامة عنوان ، وصاحبنا عمل لحية وتاب للرحمان في ليلة ونهار ولا خريجي في الدين ويفتي في الجوامع وفي علوم القرأن ويا مبدل لحية بلحية وقيت بش تفرش وتبان ، يزي من الهم وقلة الخدم جاك نهار بش توقف وتفيش ومن بياع شنغوم و حصاصر تولي تاجر دين متريش ويدور الزيرو وتزهى الأيام ويصير إلي فيبالك وتولي فارس وتتحقق منامة العتارس و على شكون تجري يا تاعس على كالراقد الناعس .