الأحزاب السياسية والرابطة المحترفة الاولى

خبزة بلوغ (The Super Mental)

ثورة 14 جانفي ثورة تكلمت عليها الناس الكل إلى التونسي ، التونسي هو الوحيد إلي ضايع فيها، 20 عام والمعركة مستمرة ضد النظام ، نظام شنوا ؟؟ نظام بن علي ؟ ولا النظام إلى ماشية به البطولة التونسية. 

نعرف كلامي غريب شوية إما البطولة التونسية عندها أثار كبيرة على الثورة التونسية وعلى الحياة السياسية، في تونس بصفة عامة المعروف والمداول إنو التونسي مغروم ياسر بالكورة والمعروف زادة إنو "الفيرجات" وخليات الأحباء في معضم الفرق القوية هي إلي ساهمت في تحريك الحس الثوري لشباب إلي كره الحاكم وكره المتراك وكرة الخسارة، و كانت إنطلاقة الثورة و بدا يدور لكلام فالالفراج، كلام زايد؟ لا يا سيدي كلام ثوري و واضح زادة من قبيل "هزوني بلمتارك والمينوت، ضربوني يا منهم شفت الموت" و "اه يا مكشخ يا إنتحاري انصرنا يا ربي يا عالي"  و "كومندو كومندو كل عادة زدمنا بالعينو" وبرشة أغاني من هذا القبيل إلي كانت مداولة في الستادات وفي القهاوي وعند لفروخ في الحومة وبعد ما صارت الثورة المباركة التونسي تبدل ولا يفهملها في السياسة. يمشيش يجد عليك ؟؟ هههه !! التونسي قعد ماهو فاهم شي ومازال يحلل في الوضع السياسي بنظرة فيراج متبعدش ياسر على تحليلو لماتش دربي ولا بارتي سقوط،
لهذا وبحيث  قلت علاش لا منفسروش التعددية الحزبية التونسية بطريقة كورية ينجم يفهمها التونسي و فيها وجه مقارنة بين احزاب السياسية و الأندية التونسية بطبيعة الأفكار والمقارنة متاعي سطحية برشة وبسيطة وموجهة لاغلبية موجودة غير مسيسة وبش تشارك كان حب ربي في الاتخابات كي نعموا طلة على الوضع السياسي في تونس تنجم تشوف هيمنة 6 أو 7 أحزاب على الساحة الوطنية  منها
 النهضة إلى إنا نسميه "حزب الشعب" ، ، الزوالي إلي ماهو فاهم شي و عندو طرف إيمان في قلبوا وصلى حتى ركعتين، يكون توجه التلقائي لحزب النهضة لذلك تنجم تشوف ياسر خور وتفشفيش من قبيل "النهضة 10 ملاين حبيناها " هعهع و نلقاو النهضة أكثر من 11 عام مهزتش "تيتر" هعهع واخر مرة طلع فيها نهضاوي في طيارة كانت عام 89 هارب  !!! .

 الحزب الوطني الحر ما يسمى بحزب "شيكات وجعالة" هعهع تأسيس الحزب هذا ميبعدش ياسر على تأسيس شيخ الأندية الماسوني، إي نعم ماسوني  ، بعد إلي تحصل خلسة على القانون الأساسي لفريق راسينغ تونس وكتابته على ضوء الشموع في ليلة واحدة هعهع!! هنا يجي الدور الفعال متاع الكرزة سليم الرياحي إلي ميبعدش ياسر على السيد الفاضل سليم شيبوب كتمويل مشبوه و إشهارات وتعفيط قالب الدنيا ورشوة تدور تحت الطاولة و المعروف أيضاً أن الدربي بين حزب الشعب والحزب الخرطر قاعد يسخن ومخيبك يا صنعتي عند غيري  !!! .

سي مصطفى بن جعفر أو ما يعرف ب "بن جعفر ياحاوي" هعهع، التكتل حزب لوجيك ويخدم على روحو إما يجري ما يلحق  ، خدمة، برامج، قيادة في غاية الروعة ، وفلوس زادة لكن وللأسف تنطبق عليه نظرية "اني اني ديما الثاني"  الله غالب الكورة تعطي لغفاصة !! .

 التقدمي أو حزب الكسكروتات والبقلاوة، بقلاوة؟؟ إي نعم بقلاوة وإلي يبشر بموسم كلو حلاوة !! أحمد نجيب الشابي أو ما يعرف بمحمد الدرويش هعهع ديما يرقع، هز منا تطيح من غادي، كلم هذا جبد به هذاكة وبدات تدخل الشكوك في الهيئة المديرة وصارت برشة استقالات و قالولو "degage" لكن هيهات سي أحمد نجيب ماهوش محمد الدرويش ، قلهم "يا نلعب يا نحرم"  .

 المؤتمر من أجل الجمهورية طحانة "حزب الشعب"؛ "البرتيات" ديمة مسيبة ، الجمهور ديمة مروح يبكي و المرزوقي صاحب نظرية "ليناتك توضحلك حياتك" "ديمة يبكي ديما يشكي" والشعب شايخ عليه ويغني "يا س ب ر، يا قح** يا س ب ر" ومن حينك، سكر؛ بال؛ روح  !! .

 القطب الديمقراطي الحداثي، وإلي يطبق في المقولة المشهورة "لمو بعضكم واعملوا جمعية" القطب إلي يلم العديد من الأحزاب اليسارية وإلي في معظمها تلعب على السقوط و إلي همها الوحيد في الفترة هذي "منع "السيسون" والعام جاي نخدمو أكثر" و إلي بدا تفكير فيها بجدية لإنتداب "المخ"، و "غرغر يا غراب"  .

 أعلنت المحكمة الابتدائية حل التجمع يوم الإربعاء 9 مارس وكان كف كبير للدساترة وإلي كانت أمالهم معلقة في الفوز بالبطولة أو على القليلة الحصول على مرتبة محترمة تليق بهم بإعتبارهم من الأحزاب المدللة و "هي هي بورقيبة مازال حي" و " الزين راهو ساحلي ودارو في القنطاوي"، و كما يقول المثل "امين البكوش في صدرو" وقع تحالف مزيان مع حكومة الظل لتأسيس معقل دستوري ماسوني يكون فيه ألفوز حليف للدساترة أو على القليلة يعطيهم حصانة ويبعدهم على السقوط  !! .

 أما ما بقية الأحزاب وإلي من أولها تلعب فالقسم الشرفي، قعدت تتمعش من شعبية الأحزاب الكبيرة سوى في تمويل أو حتى تعريف بها وما غير ما نذكرو القائمات المستقلة متاع رابطة الهواة هعهع "ستيل" ياسين العياري وشيخ اورو إلي عندكش عندي و يا بابا بيكش شحا في بالك!! و العبرة بالنتائج والملعب يوم 23 أكتوبر هو إلي بش يكون الفيصل بطبيعة إذا تعدات في ضل جو تحكيمي حكومي عادل، معناها لا قصان ضو على الستاد ولا الكردي يزفر بالتوالي والسلام.   
ب س: تعمدت بش منجبدش العمال في الحكاية خاطر العمال ميتبعوش كورة هعهع أي شكل من أشكال البيرقراطية الرأسمالية الفاحشة يكفروا بها وزيد من الفوق التنبير !!!!

Read more »